Urtero bezala, aurtengo uda honetarako ere, Salto! udalekuak antolatu ditu Udalerri Euskaldunen Mankomunitateak (UEMA). Udalerri euskaldunetako gazteek elkar ezagutzeko eta saretzeko udaleku ibiltariaz gozatzeko aukera izango dute, euskaldun gisa ahalduntzeko eta kontzientziatzeko aukera baliatuz. Beste urte batez, bi txanda egingo dira: 2024ko ekainaren 24tik uztailaren 2ra izango da lehena, eta uztailaren 4tik 12ra berriz bigarrena.
Arantza, Doneztebe, Oronoz-Mugaire eta Elizondotik oinez igaroko da aurtengo udalekua, herri bakoitzean bi gau pasako direlarik. 2006 eta 2009 urteen artean jaiotako gazteentzat den udaleku honetan izena emateko, martxoaren 31 da azken eguna, eta ondorengoak dira harremanetarako bideak: 943816699 telefono zenbakira deituta, 608668155 zenbakira Whatsapp edo Telegram mezu bat bidalita edo administrazioa@uema.eus posta elektronikora mezu bat idatzita.
