Kulturak oinarri oso garrantzitsua osatzen du Euskal Herriko gizartean, baita alor horretan lanean diharduten zenbait norbanako, eragile edo elkarteek ere. Gorka Santesteban urte luzez Euskal kulturaren jarraitzaile sutsua izan da, eta lan ugari egin du gizarteak horren berri izan zezan. Duela hilabete batzuk “Kultur Zast!” proiektua jarri zuen martxan Instagram sare-sozialean, bertan, zenbait ekintza eta jardueren berri emateaz gain, sortzaile ezberdinei egindako elkarrizketak argitaratzen ditu.
Irratiaren munduan eskarmentu handiko pertsona da Santesteban, eta horren harira, podcast berri bat jarri nahi izan du martxan Ataun Irratiaren uhinetan. Hilabeteko hirugarren igandeetan kultur sortzaile bat izango du hizpide podcastean, proiektu berriak ezagutu, lan berriei tartea egin eta sortzaileak gehiago ezagutzeko aukera bikaina eskainiko digularik. Atal guztiak entzungai izango dira ataunirratia.eus atariko Nahibezalan, podcast plataformetan eta Arrosa Irrati Sarearen webgunean.
