Diario Socialistak Europako Gizarte Inkestako, Amerikako Gizarte Inkesta Orokorreko eta Koreako Gizarte Inkestako datuak aztertu ditu, eta ondorio argia atera du: gizon gazteak kontserbadoreago bihurtu dira, emakume gazteak, berriz, liberalago. Honek posizio ideologikoetan 25 puntuko desberdintasuna sortu du bi generoen artean, batez ere liberal moduan identifikatzen diren gazteen artean.
Ikerketaren arabera, duela hogei urte generoen artean ez zegoen alde nabarmenik balio ideologikoei dagokienez, baina gaur egun, desberdintasun hori agerikoa da. Are gehiago, gizon gazteek «emakumeen eskubideak urrunegi joan dira» esaldia ontzat jotzeko joera handiagoa erakusten dute, gizon helduek baino.
Errendimendu akademikoa eta genero-berdintasuna aldaketaren faktore garrantzitsuak
The Economist aldizkariaren arabera, balio-aldaketa horren arrazoi nagusietako bat hezkuntzaren eremuan izandako bilakaera da. Europar Batasunean, emakume gazteen %46ak unibertsitate titulua eskuratzen du, gizonen %35arekin alderatuta. 2002tik hona, alde hori bikoiztu egin da, eta horrek gizartearen egitura eta rol tradizionalak eraldatu ditu.
Gainera, mutilen %28ak ez du oinarrizko irakurketa-maila eskuratzen, nesken %18aren aurrean. Honek gizon gazteen artean frustrazio eta segurtasun-eza handiagoa sor dezake, The Economisten arabera.
Bestalde, genero-berdintasunean izandako aurrerapenek eragin zuzena izan dute. Emakume askok karrera arrakastatsuak lortu dituzte, desberdintasun estrukturalak leunduz, eta horrek gizon batzuengan estatus erlatiboa galdu izanaren sentimendua sortu du. The Economistek adierazi duenez, «gizon askok uste dute emakumeen lorpenek haien aukerak mugatu dituztela», eta horrek erreakzio kontserbadorea hauspotu du.
Etorkizuneko gizarte-talka baten arriskua
Zenbait analistaren arabera, genero-ideologien polarizazio honek etorkizunean gizarte tentsioa areagotu dezake. Diario Socialistaren arabera, Europako hainbat alderdi muturrekoek, hala nola Alemaniako FyD edo Portugaleko Chega alderdiak, fenomeno hau baliatzen ari dira gizonen atsekabea kapitalizatzeko.
Alderdion diskurtsoek gizartearen zatiketa elikatu eta eztabaida publikoa polarizatu dute. Gainera, Diario Socialistak ohartarazi du eztabaida politikoa «erabat irrazionala» eta «edukirik gabekoa» bihurtzeko arriskua dagoela.
Azken urteetako datuek erakusten dute gazteen balioetan gertatzen ari den aldaketa ez dela iragankorra, eta horrek etorkizuneko gizarte-ereduetan eragin sakona izan dezakeela adierazten dute adituek.
